இராமகாதையும் இராமாயணங்களும் என்னும் இந்நூல் பல்வேறு மொழிகளிலும் பல்வேறு நாடுகளிலும் வழங்கிவரும் இராமாயண இலக்கியங்களின் மூல பாடங்களை ஒப்பாய்வு செய்கின்றது. ஒப்பாய்வு என்பது கற்பனையிலோ, கனவிலோ நிகழ்வதன்று.
நம்பகத்தன்மை மிக்க அடிப்படை ஆவணங்களே இதற்குச் சான்றாதாரங்களாகப் பயன்படுகின்றன. பேராசிரியர் மணவாளன் அவர்கள் சமஸ்கிருதம், பாலி, பிராகிருதம், தமிழ், தெலுகு, கன்னடம், மலையாளம், இந்தி, ஓரியா, வங்காளி, அசாமி என்னும் இந்திய மொழிகளிலும், ஜாவா, பாரசீகம், ஜப்பான், மலாய், பர்மா, தாய்லாந்து, லாவோஸ், பிலிப்பைன்ஸ் போன்ற பிற நாட்டு மொழிகளிலும் பல்வேறு காலகட்டங்களில் எழுந்த இராமாயணங்களை ஒப்பாய்வு செய்து, அவற்றின் அணுகுமுறைகள், கட்டமைப்பு, பாத்திரப்படைப்பு போன்ற காப்பியக் கூறுகளில் அவை தம்முள் எவ்வாறு ஒன்றுபட்டும் வேறுபட்டும் நிற்கின்றன என்பதை எடுத்துக்காட்டுகிறார். ஒரு பேரிதிகாசத்தைப் பாந்து, விரிந்து ஆய்வு செய்வது இதுவே தமிழ் மொழியில் முதல் முயற்சியாகும்.
