ஊத்துமலை ஜமீன் – சுகந்தி அன்னத்தாய்

Description

தென்பாண்டிச் சீமையில், மறவர் பாளையங்களின் வரிசையில் தனக்கென ஒரு தனித்துவமான இடத்தைப் பிடித்திருந்தது ஊத்துமலை ஜமீன். இராமநாதபுரம் பகுதியின் “கிழுவை” நாட்டிலிருந்து கிளைத்தெழுந்த இவ்வம்சத்தினர், கொண்டையங்கோட்டை மறவர் பிரிவைச் சேர்ந்தவர்கள். மதுரை மன்னன் விஸ்வநாத நாயக்கர் நிறுவிய 72 பாளையங்களில் ஒன்றாகவும், 148 கிராமங்களை உள்ளடக்கிய பெரிய பாளையமாகவும் (சுரண்டை ஜமீனையும் இணைத்து) திகழ்ந்த ஊத்துமலை, பாண்டியப் பேரரசின் நம்பிக்கைக்குரிய தூணாக விளங்கியது.

பாண்டிய மன்னர்களுக்குப் பேருதவிகள் புரிந்து, நாட்டில் அமைதி நிலவக் காரணமாக விளங்கிய ஊத்துமலை ஜமீன்தார்களுக்கு, “விஜயகுணராம பாண்டியன்” எனும் சிறப்புப் பட்டமும், உபய சாமரம், புலிக்கொடி, மகரக்கொடி, இந்திரனின் வலரிக்கொடி போன்ற உயரிய சின்னங்களும் பல்வேறு காலகட்டங்களில் பாண்டிய மன்னர்களால் வழங்கப்பட்டு கௌரவிக்கப்பட்டனர். உக்கிரன்கோட்டையைச் சுற்றியிருந்த குரும்பர்களின் இடையூறுகளை அடக்கி, அப்பகுதியில் புதர்க்காடுகளை அழித்து “ஊத்துமலை” எனும் ஊரையும், கோட்டையையும் நிர்மாணித்த பெருமை இவர்களுக்கு உண்டு. “ஊற்று உள்ள மலை” என்பதே காலப்போக்கில் ஊத்துமலை என மருவியது.

வீரத்திலும் விவேகத்திலும் சிறந்து விளங்கிய ஊத்துமலை மன்னரின் புகழ், தென்காசி வல்லப மகாராஜா (சடாவர்மன் சீவல்லவன்) நடத்திய நவராத்திரி விழாவில் பங்கேற்று சிறப்புச் செய்ததிலும், அதன் பின்னர் தென்காசி ஸ்ரீ காசிவிஸ்வநாதர் திருக்கோயிலின் தெப்பத் திருவிழாவை நடத்தி வந்ததிலும் வெளிப்படுகிறது. பாண்டியன் அரண்மனையில் சண்டையிட வந்த யானையொன்று மிரண்டு பொதுமக்களைத் தாக்க முற்பட்டபோது, அதனை அடக்கிய வீரதீர செயலுக்காக “யானையைப் பிடித்து அடக்கிய வீரர்” எனும் பட்டமும், யானையின் மீதேற்றி மேளதாளத்துடன் வீதியுலா வரும் மரியாதையும் பாண்டிய மன்னனால் வழங்கப்பட்டது.

மதுரையில் நாயக்கர் ஆட்சி மலர்ந்தபோதும், விஸ்வநாத நாயக்கர் ஊத்துமலைப் பாளையக்காரரை மதுரை கோட்டையின் 72 கொத்தளங்களில் ஒன்றின் மேற்பார்வையாளராக நியமித்து மதிப்பளித்தார். பிற்காலத்தில், மாவீரன் பூலித்தேவன் தலைமையில் பாண்டியர் ஆட்சியை மீண்டும் நிலைநிறுத்த உருவான ஐந்து முக்கிய கோட்டைகளில், மாறவர்மன் பெயரில் அமைந்த ஊத்துமலைக் கோட்டையும் ஒன்றாகும்.

இவர்களின் பிற்காலத் தலைநகரான வீரகேரளம்புதூர், சிற்றாற்றங்கரையில் எழிலுற அமைந்துள்ளது. இந்த அரண்மனையின் நடுவே சிற்றாறு ஓடுவது அக்காலத்திய தென்னாட்டுப் பாளைய அரண்மனைகளிலேயே தனிச்சிறப்பு வாய்ந்ததாகும். இப்பெயர், பாண்டிய மன்னன் வீரகேரளவர்மன் பெயராலோ அல்லது இப்பகுதியின் வீரத்தையும் செழிப்பையும் கண்டு வியந்த சேர மன்னன் சூட்டியதாலோ ஏற்பட்டிருக்கலாம் எனக் கூறப்படுகிறது. அவ்வாறு வருகை தந்த சேர மன்னனுக்கு ஊத்துமலை மன்னர் பரிசளித்த விநாயகர் சிலையே செங்கோட்டையில் “வீரகேரள விநாயகராக” இன்றும் வழிபடப்படுகிறது.

இவ்வாறு, வீரத்திற்கும், நிர்வாகத் திறத்திற்கும், இறைப்பணிக்கும், கலைபோற்றும் பண்பிற்கும் உதாரணமாகத் திகழ்ந்த ஊத்துமலை ஜமீன், தென்பாண்டிச் சீமையின் வரலாற்றில் அழியாப் புகழுடன் விளங்குகிறது.