தமிழகத்தின் நெற்களஞ்சியமான தஞ்சாவூர் என்னும் ஊருக்கு அப்பெயர் வந்ததற்கான காரணங்களாகப் பல்வேறு வரலாற்றுச் செய்திகளும், செவிவழிக் கதைகளும் கூறப்படுகின்றன.

தஞ்சம் அளித்த ஊர்

ஒரு காலகட்டத்தில் இப்பகுதியில் கடும் பஞ்சம் தலைவிரித்தாடியதாகவும், பசி பட்டினியால் மக்கள் அல்லலுற்று அலைந்ததாகவும் கூறப்படுகிறது. அப்போது, காவிரி நதிக்கரையில் அமைந்த இந்த இடமே அவர்களுக்குப் புகலிடமாகி, ‘தஞ்சம்’ அளித்திருக்கிறது. இதன் காரணமாகவே இவ்வூர் ‘தஞ்சாவூர்’ என்ற பெயரைப் பெற்றது என்பது ஒரு முக்கியக் கருத்தாகும்.

தண்சாய் மற்றும் தண்+செய்

இப்பகுதியில் ‘தண்சாய்’ என்றொரு வகைக் கோரைப்புல் அதிகளவில் காணப்பட்டது. அதனால் ‘தண்சாய்’ என்பது காலப்போக்கில் மருவி ‘தஞ்சை’ என்றும், அதனுடன் ‘ஊர்’ என்பது இணைந்து ‘தஞ்சாவூர்’ என்றும் ஆனதாகத் தெரிகிறது. மேலும், ‘தஞ்சை’ என்பதற்கு ‘குளிர்ந்த வயல்கள் நிறைந்த பகுதி’ என்றும் பொருள் கொள்வர். இதனை ‘தண் + செய்’ (குளிர்ந்த நிலம்/வயல்) எனப் பிரித்துப் பொருள் கூறுவதுண்டு. இதுவே மருவி தஞ்சை என்றானது என்றும் ஒரு கருத்து நிலவுகிறது.

பிற வரலாற்றுப் பெயர்கள்

முற்காலத்தில் இவ்வூர் ‘தஞ்சாறை’ என்றே அழைக்கப்பட்டு வந்ததாகவும், பின்னரே அது தஞ்சாவூர் என்று மாறியதாகவும் ஒரு கூற்று உள்ளது. அதேபோல, சோழர்களின் பூர்வீகமான வலங்கைமானுக்கு அருகிலுள்ள ‘ஆவூர்’ என்ற ஊரிலிருந்து அவர்கள் இங்கு குடியேறியதால், தஞ்சையுடன் ஆவூரும் இணைந்து ‘தஞ்சாவூர்’ ஆனது என்றும் சொல்லப்படுகிறது. இவைதவிர, தஞ்சாபுரி, குபேரபுரி, விஜயபுரி, அழகாபுரி போன்ற வேறு பல பெயர்களும் இவ்வூருக்கு வழக்கில் இருந்துள்ளன.

புராணக் கதை (தஞ்சாசுரன்)

இவ்வூரின் பெயர்க்காரணம் குறித்து ஒரு புராணக் கதையும் வழங்கப்படுகிறது. தஞ்சாசுரன் என்றொரு அரக்கன், சமீவன க்ஷேத்திரத்தில் இருந்தவர்களை அச்சுறுத்தியும், துன்புறுத்தியும் வந்தான். அவனது அட்டூழியங்களைக் கண்டு பொறுக்காத மக்கள், அங்கிருந்த ஆனந்தவல்லி அம்பாளிடம் சென்று முறையிட்டனர். மக்களின் துயர் துடைக்க, சக்தி உருவெடுத்த அம்பாள், தஞ்சாசுரனுடன் கடும் போர் புரிந்து இறுதியில் அவனை வதைத்தாள். உயிர் பிரியும் தருவாயில் தஞ்சாசுரன், “அன்னையே! தங்கள் திருக்கரங்களால் உயிர் துறப்பதால் நான் மோட்சம் அடைவேன். இத்தருணத்தில், நான் வாழ்ந்த இப்பகுதி என் நினைவாக ‘தஞ்சாசுரன்’ என்ற பெயராலேயே அழைக்கப்பட வேண்டும் என்ற என் பணிவான வேண்டுகோளை ஏற்க வேண்டும்” என்று வேண்டினான். அவனது கோரிக்கையை ஏற்ற அம்பாள், அவ்வாறே அழைக்கப்பட ஆணையிட்டாள். அதுமுதல் இவ்வூர் ‘தஞ்சாவூர்’ என்று அழைக்கப்படுவதாகப் புராணம் கூறுகிறது.

கல்வெட்டு மற்றும் இலக்கியச் சான்றுகள்

தஞ்சாவூர் குறித்த மிகப்பழமையான வரலாற்றுச் சான்றுகளும் உள்ளன. கி.பி. 6-ஆம் நூற்றாண்டைச் சேர்ந்த பல்லவ மன்னன் சிம்மவிஷ்ணுவின் கல்வெட்டுகளிலும், திருநாவுக்கரசரின் ‘திருவீழிமிழலைத் தாண்டக’த்திலும் இவ்வூர் பற்றிய குறிப்புகள் காணப்படுகின்றன. மேலும், பெரிய கோயில் கட்டப்படுவதற்கு முன்பே இங்கு ‘தஞ்சை தளிக்குளத்தார் கோயில்’ (தற்போதைய தஞ்சபுரீஸ்வரர் கோயில்) என்ற சிவன் கோயில் இருந்துள்ளது. இக்கோயிலின் பெயராலேயே இவ்வூர் ‘தஞ்சாவூர்’ என அழைக்கப்பட்டதாகவும் வரலாறு கூறுகிறது.

நான்கு தஞ்சாவூர்கள்

ஒரு சுவையான தகவல் என்னவென்றால், தமிழகத்தில் மட்டும் ‘தஞ்சாவூர்’ என்ற பெயரில் நான்கு ஊர்கள் உள்ளன. மன்னார்குடி அருகிலும், சத்தியமங்கலம் அருகிலும் இப்பெயரில் ஊர்கள் உள்ளன. பாண்டிய மன்னனின் அமைச்சரான சந்திரவாணனின் சொந்த ஊரும் ஒரு தஞ்சாவூர். தற்போது புகழ்பெற்ற பெரிய கோயில் அமைந்துள்ள இந்தத் தஞ்சாவூர் என ஒரே பெயரில் நான்கு ஊர்கள் அமைந்திருப்பது வியக்கத்தக்கதாகும்.

இவ்வாறு பல்வேறு காரணங்களும், கதைகளும், வரலாற்றுச் சான்றுகளும் கூறப்பட்டாலும், ‘தஞ்சாவூர்’ என்ற பெயர் வந்ததற்கான உறுதியான காரணம் இதுதான் என்பதற்கு அறுதியிட்ட தகவல்கள் இல்லை என்பதே நிதர்சனம்.

தஞ்சையை ஆண்ட மன்னர்கள்

காவிரி நதிக்கரையில் அமைந்த செழிப்பான தஞ்சைப் பகுதியை, வரலாற்றின் பல்வேறு காலகட்டங்களில் பல பேரரசுகள் ஆட்சி செய்துள்ளன.

பல்லவர்கள் (கி.பி. 6-ஆம் நூற்றாண்டு), முத்தரையர்கள் (கி.பி. 7 மற்றும் 8-ஆம் நூற்றாண்டுகள்), சோழர்கள் (கி.பி. 846 முதல்), பாண்டியர்கள் (கி.பி. 1219 முதல்), போசாளர்கள், விஜயநகரப் பேரரசர்கள், நாயக்கர்கள் (கி.பி. 1532 முதல்) மற்றும் இறுதியாக மராட்டியர்கள் (கி.பி. 1676 முதல்) எனப் பலரும் தஞ்சைத் தரணியை ஆட்சி செய்துள்ளனர் என்பதைச் சரித்திரச் சான்றுகள் உறுதிப்படுத்துகின்றன.

சோழர்களின் பொற்காலம்

தஞ்சையை ஆண்ட மன்னர்களுள் சோழர்களே தலைசிறந்தவர்களாக இன்றும் அறியப்படுகின்றனர்.

சங்ககாலச் சோழ மன்னனான கரிகாற் பெருவளத்தான், கி.பி. முதலாம் நூற்றாண்டில் தஞ்சையை ஆட்சி புரிந்தான் என்பதைத் தனிப்பாடல் ஒன்று விவரிக்கிறது. அவனுக்கு ஏற்பட்டிருந்த கருங்குஷ்ட நோய், இங்கிருந்த சிவகங்கைக் குளத்தில் நீராடியதும் மறைந்ததாகக் கூறப்படுகிறது. ‘பஞ்சுருவம் தேய்த்தபெரு நோய் தீர்த்துச் செம்பியனைக் காத்தபுகழ் வாய்ந்த சிவகங்கை’ என்கிறது அப்பாடல்.

சோழர் பரம்பரையில் வந்த கோச்செங்கட் சோழன் 70 மாடக் கோயில்களைக் கட்டியதாகவும், தஞ்சைத் தளிக்குளத்தார் கோயில் அவற்றில் ஒன்று என்றும் சான்றுகள் தெரிவிக்கின்றன. புகழ்பெற்ற தஞ்சை பெரிய கோயில்கூட இந்த மாடக் கோயில் வகையைச் சார்ந்ததுதான்.

பிற்காலச் சோழப் பேரரசு அமைய வித்திட்டவர் விஜயாலயச் சோழன் ஆவார். கி.பி. 850-இல் சாத்தன் பழியிலி என்ற முத்தரையர் குலச் சிற்றரசனிடம் போர் புரிந்து, 90 விழுப்புண்களைப் பெற்று தஞ்சாவூரைக் கைப்பற்றினார். இவரே தஞ்சையைத் தலைநகராகக் கொண்டு சோழப் பரம்பரையை மீண்டும் தோற்றுவித்தார். இந்தப் பரம்பரையில் தோன்றிய மாமன்னர்தான் ராஜராஜசோழன். இவர் ‘ராஜகேசரி’ என்பது உட்பட 42 சிறப்புப் பெயர்களைப் பெற்றுப் பெரும் புகழுடன் விளங்கினார். இவர்கள் காலத்தில் கோயில்களுக்கும், கட்டிடக் கலைக்கும் அளிக்கப்பட்ட முக்கியத்துவத்தின் சாட்சியாக, உலகமே வியக்கும் தஞ்சை பெரிய கோயில் இன்றும் கம்பீரமாக நிலைத்து நிற்கிறது.

ஆங்கிலேயர்களின் வருகை

காலப்போக்கில், கிழக்கிந்தியக் கம்பெனி என்னும் பெயரில் வணிகம் செய்வதற்காக ஆங்கிலேயர்கள் இந்தியாவிற்குள் நுழைந்தனர். ஆரம்பத்தில் வணிகர்களாக வந்த அவர்கள், இந்திய மக்களின் நிலையைத் தெளிவாகப் புரிந்துகொண்டு, மெல்ல மெல்லத் தங்கள் ஆதிக்கத்தை நிலைநாட்டத் தொடங்கினர். தங்கள் தந்திரங்களாலும், சூழ்ச்சிகளாலும் இந்தியர்களை எளிதில் வீழ்த்திவிட முடியும் என்பதை உணர்ந்த அவர்கள், இறுதியில் இந்திய ஆட்சி அதிகாரத்தைத் தங்கள் கைகளில் எடுத்துக் கொண்டனர்.

“வான் பொய்ப்பினும் தான் பொய்யா மலைத்தலைய கடற்காவிரி…”

இயற்கை பொய்த்தாலும், தான் பொய்க்காமல் பொன் விளையச் செய்யும் பொன்னி நதி பாயும் பூமியே சோழ நாடு. சங்க இலக்கியம் முதல் பாரதியின் பாடல்கள் வரை ‘காவிரி’ வெறும் நதியல்ல அது தமிழர்களின் பண்பாட்டு அடையாளம்.

கல்லணை கட்டிய கரிகாலன் முதல், தஞ்சை பெரிய கோவில் எழுப்பிய ராஜராஜன் வரை – இந்தத் திருநாட்டின் வரலாற்றை ஒரு புத்தகமாகத் தொகுப்பதில் பெருமிதம் கொள்கிறோம்.தமிழ் மண்ணை ஆண்ட மூவேந்தர்களுள், கலைக்கும் தமிழுக்கும் சோழர்களும் பாண்டியர்களும் ஆற்றிய தொண்டு ஈடு இணையற்றது. “சோழ நாடு சோறுடைத்து” என்ற பழமொழிக்கேற்ப, தமிழகத்தின் நெற்களஞ்சியமாகத் திகழும் தஞ்சை மற்றும் திருச்சியின் பெருமைகளை இன்றைய தலைமுறைக்குக் கடத்துவதே இந்த நூலின் நோக்கம்.

காவிரியின் கருணை

கர்நாடகத்தில் பிறந்தாலும், சோழ மண்ணில் தவழ்ந்து தமிழகத்தின் தாகம் தீர்க்கும் காவிரித் தாயின் வரலாற்றுப் பயணம். உலகமே வியந்து பார்க்கும் தஞ்சைப் பெரிய கோவில் மற்றும் மலையக் கோட்டை உச்சிப் பிள்ளையார் கோவிலின் ஆன்மீக மற்றும் வரலாற்றுச் சிறப்புகள். இரண்டாயிரம் ஆண்டுகளுக்கு முன்பே நீர் மேலாண்மைக்குச் சான்றாக நிற்கும் கரிகாலனின் ‘கல்லணை’.

பண்பாட்டு சங்கமம்:

வைணவத்தின் தலைமையிடமான ஸ்ரீரங்கம், புதுக்கோட்டையின் குடைவரைக் கோயில்கள் மற்றும் மகாத்மா காந்தி அடிகளால் அடிக்கல் நாட்டப்பட்ட திருச்சி ‘காந்தி மார்க்கெட்’ போன்ற சுவாரஸ்யமான தகவல்கள். பக்தி, மொழிப்பற்று, மக்கள் சேவை என இம்மன்னர்கள் காட்டிய வழி இன்றும் நமக்கு உத்வேகம் அளிப்பவை.

சோழ மண்டலத்தின் செழுமையையும், திருச்சி – தஞ்சை நகரங்களின் தொன்மையையும் கண்முன்னே நிறுத்தும் ஒரு காலப் பெட்டகமாக இந்த நூல் அமையும்.

Buy this book : https://heritager.in/product/thiruchy-thanjai-sarithira-suvadugal/

Books Related this: தஞ்சை

சங்க இலக்கியம் , கோயில்,வரலாறு தொடர்பான Maga collection நமது Heritager.in Store-யில் தற்போது விற்பனையில்

சங்க இலக்கியம் : https://heritager.in/product-category/books/tamil/literature/sangam-age/

வரலாறு : https://heritager.in/product-category/books/tamil/history/

கோயில் : https://heritager.in/product-category/books/tamil/architecture/temple/

To order on WhatsApp: wa.me/919786068908
Call to Order: 097860 68908
Visit our Store: https://maps.app.goo.gl/Xyo7ARHq39RJ3TQc8